Leiga av bústaðum

Almannamálaráðið varðar av leigulógini, t.e. løgtingslóg nr. 60 frá 26. mai 2010 um útleigan av bústøðum. Lógin fevnir um alla leigu av húsum ella hølum, ið verða nýtt til bústað – tó ikki leiguavtalur, har avtalaða tíðarskeiðið er styttri enn 3 mánaðir.

Lógin tilskilar rættindi og skyldur hjá ávikavist leigara og útleigara. Lógin heimilar harafturat leigunevndini at taka støðu í ávísum trætumálum millum leigara og útleigara, eins og lógin eisini inniheldur serligar reglur fyri virksemið hjá Almannaverkinum og Bústøðum o.ø.

Øll leigumál skulu nýta ein og sama leigusáttmála, ið landsstýrismaðurin ásetir í kunngerð. Endamálið er at tryggja leigara móti, at órímiligar avtalur verða gjørdar. Tó kunnu útleigari og leigari sínámillum avtala at leigari fær betri treytir enn tey minstukrøv, ið eru ásett í leigulógini.

Leigulógin hevur í stuttum við sær:

  • At leigari, sum verður uppsagdur, fær eina rímiliga uppsagnartíð, og harvið høvi at finna sær annan bústað.
  • At leigarin verður vardur ímóti tilvildarligari uppsøgn frá einum vinnuligum útleigara.
  • At ikki vinnuligur útleigari kann sleppa burtur úr einum leigumáli uttan stórvegis trupulleikar, og at útboðið av leigubústøðum harvið kann økjast.
  • At útleigari skjótast til ber kann sleppa av við leigara, sum misheldur skyldur sínar sambært leigusáttmálanum.
  • At leigari skjótast til ber kann sleppa burtur úr einum leigumáli, um útleigari misheldur skyldur sínar sambært leigusáttmálanum.
  • Leigunevnd verður sett at taka avgerð í trætumálum millum leigara og útleigara

Lógin er broytt í fleiri umførum, síðan hon á fyrsta sinni kom í gildi í 2010. Við broytingini í 2019 varð markið millum vinnuliga og ikki vinnuliga útleigu flutt (frameftir bara talið av leigumálum, ið er avgerandi), eins og leigunevndin fekk heimild at seta niður ta leigu, sum partarnir sínámillum hava avtalað, um leigan verður mett at vera greitt órímilig.

Almannamálaráðið ger lógaruppskot, meðan leigunevndin – sum er sjálvstøðug nevnd, sett av landsstýrismanninum í almannamálum – tekur avgerð í trætumálum millum leigarar og útleigarar.

Ein løgfrøðingur tekur sær av dagliga virkseminum hjá leigunevndini. Sí nærri um telefontíð o.a. á heimasíðu nevndarinnar.

Leigunevndin

Leigusáttmáli og innflytingarfrágreiðing

Eftir leigulógini, ið kom í gildi 1. september 2010, skulu øll leigumál nýta ein og sama leigusáttmála. Tá flutt verður inn í leigaða bústaðin, skulu útleigari og leigari í felag gera eina innflytingarfrágreiðing, sum skal lýsa, hvørjum standi bústaðurin er í.

Oyðibløð og vegleiðing finnur tú her.